CAGAYAN DE ORO CITY – Napatay kay giingong misukol sa hiniusang operasyon sa PNP’s Special Investigation Task Group Gov. Adiong ug mga sa mga sundalo gikan sa 5th IB,Philippine Army ang prime suspect sa pag-ambush sa convoy ni Lanao del Sur Gov. Mamintal ‘Bombit’ Adiong Jr sa lungsod sa Maguing sa maong lalawigan ning semana lamang.
Giila ni Police Regional Office BARMM Director Brig Gen Allan Nobleza ang napatay sa state forces nga si Oscar ‘Tacmar’ Capal Gandawali kinsa nagbarog nga lider sa gikaintapang criminal gang ug nag-atubang sa pito ka counts sa kasong murder sa Lanao del Sur.
Miingon si Nobleza nga gisilbi sa mga otoridad ang patung-patong nga warrant of arrest batok kang Gandawali apan gilayong nagpaulan kini sa mga bala hinungdan nga natigayon ang pila ka minutos nga engkuwentro.
Gilayong napatay si Gandawali apan iya usab naigo sila Army Staff Sgt Nio Michkael Angelo Virecio ug Pilimoknana Punong Brgy Gamon Manonggiring nga hinoon pulos na usab luwas human nadala sa ospital.
Si Gandawali ang natumbok usab nga maoy mihimo pag-ambush patay sa lima ka PDEA agents sa lungsod sa Kapai,Lanao del Sur sa tuig 2018;financier sa illegal drugs disbribution sa Maguing ug mga silingang lugar sa Lanao Sur ug protector sa teroristang Dawlah Islamiyah.
Narekober sa crime scene ang klase-klase nga mga armas,mga bala ug halos 90-mil pesos nga balor sa gitoohang shabu atol sa maong operasyon.
Hisayrang sa pagka-ambush kang Gov Adiong sa miaging Pebrero 17 ning tuiga,patay ang tulo ka police escorts niini ug iyang usa mga drayber nga pulos ra pud niya paryente.
