CAGAYAN DE ORO CITY, Philippines – Namaligya sa tag 29 pesos kada kilo nga bugas ang National Irrigation Administration sa Northern Mindanao.
Apan namahayag si Larry Franada, acting regional manager sa NIA-10, nga kadto lang dunay coupon ang makapalit sa maong mga bugas.
Base sa balaod, kadto lang mga solo parent, indigents, senior citizens, persons with disabilities, ug mga kabus nga miyembro sa 4Ps ang makapahimulos sa baratong bugas.
Sa wala pa masugdi ang pagpamaligya, mipasidaan si Franada nga gidili ang pagbaliya subli o “re-selling” sa mga napalit nga bugas gikan sa ilang ahensiya.
Hisayran nga niadtong Biyernes, takdo sa adlaw nga natawhan ni Presidente Ferdinand Marcos Jr., gisubhan ang nationwide nga inisyatibo sa “Kadiwa ng Pangulo Murang Bigas sa NIA @P29”.
Dinhi sa region 10, mukabat sa 700 ka sakong bugas nga dunay sulod nga 10 kilogramos ang nabaligya sa mga ‘targeted’ nga mga benepisyaryo.
