Gilauman nga motestigo sa Senado si kanhi Senador Antonio “Sonny” Trillanes IV kalabot sa alegasyon sa unexplained wealth batok kang Vice President Sara Duterte.
Matod ni House prosecution legal spokesperson Atty. Benjamin Tolosa Jr., si Trillanes maoy usa sa gidugang mga mga testigo sa prosekusyon nga motestigo sa Article II.
Gihangyo sa prosekusyon ang Senado nga mag-isyu og subpoena kang Trillanes aron iyang ma-ipresentar ang mga alegasyon kabahin sa mga transaksiyon sa bangko ug giingong pagdawat sa pondo sa bise presidente gikan sa nagkalain-laing indibidwal ug tinubdan.
Niadtong Abril, gibutyag ni Trillanes sa pagdungog sa House Committee on Justice nga mokabat sa 181 milyon pesos ang gi-ingong nadawat ni Duterte ug sa iyang pamilya gikan sa gituohang drug personality nga si Samuel Uy.
Samtang, gikumpirma sa Anti-Money Laundering Council o AMLC nga adunay mga transaksiyong motakdo sa petsa ug kantidad sa labing menos 18 ka transaksiyong gihisgutan ni Trillanes, apan wala niini mapamatud-i kung asa gyud gikan o unsay katuyoan sa maong mga transaksiyon.
