CAGAYAN DE ORO CITY – Gi-alerto ni Cagayan de Oro Archbishop Jose Cabantan ang mga tumutu-ong Katoliko nga dili na tugtan nga makahimo’g santos nga misa sa mga balay-balay si Fr. Melvin Clapano dinhi sa syudad ug lalawigan.
Kini tungod kay nakasupak sa pipila ka lagda sa simbahang Katolika si Clapano hinungdan nga gi-suspenso sa iyang pagka-pari.
Gibutyag ni Cagayan de Oro Archdiocese consultor Msgr Rey Monsanto nga tungod sa maong mga kasupakan sa maong pari gihukasan una kini sa iyang mga tahas sulod sa simbahan.
Gani,mismo ang santo papa lamang ang makabalik kaniya sa bokasyon kon dunay bug-at nga konsiderasyon.
Una nang nagpalugwa si Cabantan sa memorandum aron ipahibao sa mga matuhu-on nga gidid-an si Clapano sa paghimo sa mga sakramento sa simbahan sa sumbanan nga misulay kini pagminyo ug pagsulod usab sa laing tinuhuan.
Dugtong niini,bukas sa kanunay ang simbyahan sa Bombo Radyo kang Clapano aron makahatag sa tubag kabahin sa mga giatubang niya nga mga isyu sa simbahan.
Hisayrang taud-taod nang katuigan nga ubos sa suspensyon ang pagkapari ni Clapano kinsa usa sa mga Diocesan priest nga nakabase dinhi sa dakbayan.
