Gikondena ni Atty. Joel Mahinay sa Union of Peoples Lawyers in Northern Mindanao ang pipila ka programa sa gobyerno nga nagahatag og ayuda sa katawhan, ilabi na sa kabus, kay matod niya, kini mahimong porma sa korapsyon sa nasud. Butyag ni Mahinay, husto ang 4Ps program alang sa mga pamilyang nanginahanglan kay kini nagtabang sa mga kabus nga naglisod sa kinabuhi. Apan, matod niya, ang maong pribilehiyo dili angay mahimong malungtaron ug kinahanglan nga suporta lang kini sa katawhan, dili permanente. Nagtuo si Mahinay nga mas gikinahanglan karon sa katawhan ang husto nga livelihood programs kaysa pinansyal nga suporta. Gisubo niya nga wala niya nabati nga adunay tinud-anay nga programa sa gobyerno nga nagsuporta sa livelihood sa katawhan. Gipunting usab ni Mahinay ang Agrarian Reform Program nga karon nahimo na nga Agrarian Return, ug giingon niya nga nagpakita kini og problema sa prayoridad ug sistema sa nasud.
Written by: James Oliver
