CAGAYAN DE ORO CITY-Dakpan sa kapolisan ang American citizen kuyog ang laing tulo ka Pinoy nga naghithit sa marijuana diha sa may Saga Resort, Zone 7,Brgy Bulua ning syudad.
Giila ang mga suspek nga sila si Jolmie Erick Smith, 43-anyos, usa ka American- national ug negosyante; Salman Imam,18-anyos taga Barra, Opol Misamis Oriental ug duha ka menor de edad.
Sumala ni Police Capt Breccia Ruth Townend,hepe sa Bulua Police Station nga nasapon sa akto ang mga suspek nga naggamit sa marijuana.
Giandam na ang kasong RA 9165 Section 11 batok sa mga suspetsado. Una niini, moabot sa 6 ka gramo sa marijuana ang nakuha sa posisyon sa mga suspek.
Samtang gikakurat ni Smith nga nadakpan kini tungod sa paggamit sa suspected marijuana sulod sa usa ka resort sa Bulua sa syudad kagabii.
Miingon si Smith nga wala siya magtoo nga marijuana ang sulod sa tabako nga naggamit niya kuyog ang tulo ka Pinoy nga gilakipan sa duha ka menor de edad.
Dugtong niini,mangayo kini’g tabang sa iyang abogado aron temporaryo makagawas batok sa maong kaso.
Si Smith ang miabot sa Pilipinas tuig 2018 aron unta makigkita sa iyang Pinay girl friend sa Butuan City apan sila nagkabulag hinungdan nakaabot ning syudad.
