Gipatin-aw sa depensa ni Vice President Sara Duterte nga matud pa walay madumduman ang Bise Presidente nga usa ka BPI joint account nga nakapangalan kaniya ug sa amahan niining si kanhi Presidente Rodrigo Duterte.
Gipangutana kini ni Senator-judge Risa Hontiveros ngadto defense counsel Michael Poa human mitumaw sa pagdungog ang mga rekord sa maong account ug nangayo kini og katin-awan sa posisyon sa depensa bahin sa giingong kakuwang sa recollection ug partisipasyon sa Bise Presidente sa mga transaksyong gipahigayon sa maong joint account.
Matud ni Poa, ang punto sa ilang sulat sa maong bangko kay aron matino kung anaa ba ang maong account ug aron usab makapangayo og dokumento bahin niini kung anaa kini.
Mahinumdoman nga una nang gikumpirma sa witness nga si Marwin Galvez gikan sa maong bangko nga adunay duha ka time deposit ubos sa joint account sa Bise Presidente ug sa amahan niini. Sa laing bahin, gipasiugda sa kampo sa depensa nga kinahanglang tin-aw nga adunay aktuwal nga partisipasyon ug authorization ang Bise Presidente sa mga transaksyong sulod sa maong joint account. (raniel mahunyag)
