Gisiguro sa Metro Pacific Water (MetroPac-COBI) nga magpabilin ang igong suplay sa tubig mainom sa Semana Santa bisan pa sa nagpadayon nga rehabilitasyon sa Taguanao Water Treatment Plant.
Gibutyag ni Atty. Roberto Rodrigo, Senior Legal Counsel sa MetroPac, nga human masugdan ang unang phase sa repair, ilang gi-han-ay ang iskedyul aron dili maapektuhan ang mga adlaw sa igpapahulay, ilabi na sa mga mahal nga adlaw.
Siya miingon nga dunay koordinasyon sa lokal nga kagamhanan ug barangay aron mahatagan sa alternatibong suplay sa mga lugar nga posibleng maapektuhan.
Gibutyag usab niini nga aduna silay water drop-off points nga ipahimutang aron masiguro nga walay barangay nga dili marasyonan sa tubig.
Miingon si Rodrigo nga ang MetroPac nagpasalig nga human sa rehabilitasyon, mas lig-on ug mas limpyo ang tubig nga mahatag sa katawhan.
Ang ilang tumong mao ang pagpanalipod sa interes sa publiko samtang nagpadayon ang teknikal nga kalihokan sa planta.
