Gipapaspasan na sa lokal nga kagamhanan sa Cagayan de Oro ang pagpalit og mga water filtration equipment ug mga water tanker sa kabarangayan isip proactive nga pangandam sa posibleng kanihit sa tubig atol sa Super El Niño.
Subay sa rekomendasyon sa task force nga gipaambit ni Acting City Information Officer Jade Adeser, mahimong gamiton sa mga barangay ang ilang 5 porsyento nga disaster fund sa pagpalit og tanker nga maghakot og tubig gikan sa centralized source sa City Hall.
Gipadayag usab ni Adeser nga magamit ang mga water filtration machine sa paglimpyo sa tubig gikan sa suba alang sa pagkaligo ug pagpanghugas kon mosamot ang kanihit sa agas sa gripo.
Gipasabot sa opisyal sa City Hall nga gusto ni Mayor Rolando Klarex Uy nga mahuman dayon ang pagpamalit sa maong mga ekipo aron dili maghulat ang syudad nga moigo pa ang krisis una molihok.











