Gikompirmar ni City Information Officer Jade Adeser nga milusad sa random drugtest ang City Anti-Drug Abused Division, pinaagi sa Philippine Drug Enforcement Agency (PDEA-X) sa upat ka departamento sa City Hall.
Lakip sa gipakuratan sa drug test ang mga empleyado sa Public Employment Services Office (PESO), City Assessment Department (CAD), Local School Board (LSB) ug Oro Trade and Investments Promotion Center (ORO-TIPC).
Misumada sa 143 ka empleyado ang nasusi ug wala pay opisyal nga napagawas nga report ang PDEA-X kung adunay nagpositibo gikan sa 4 ka departamento.
Gisupak usab ni Adeser ang usa ka local media entity nga nagpagawas sa report nga adunay usa nagpositibo tungod kay bisan sila wala pa makadawat sa kopya sa resulta.
Kung duna man, huptan kini sa City Anti-Drug Abused Division (CADAC) pinaagi sa pagpangulo ni Mayor Rolando Klarex Uy, ug laing kopya usab ang ihatag sa ilang Human Resource Department (HRD) aron pasabton ang nagpositibo ug ipaubos sa rehabilitasyon.
