Kadtong mga lider nga guilty ug adunay dautang binuhatan batok sa katawhan lamang ang mahadlok sa gahom sa International Criminal Court.

Mao kini ang gibarugan ni People’s Constitutional Reform Initiative Convenor ug Lay Theologian Wilson Amad human gikuwestiyon ang tinguha nila ni United States President Donald Trump, Russian President Vladimir Putin, ug Chinese President Xi Jinping nga pahuyangon ang maong hukmanan.

Obserbasyon ni Amad, nasayod ang maong mga higanteng pangulo ilawom sa konsensya nga daghang inosente ang nangadamay sa ilang binuhatan ug nahadlok nga mahisama sa mga kanhi tyrants ug abusado nga nabilanggo sa ICC.

Giklaro sa lay theologian nga dili angay kahadlokan ang korte sa kalibutan kon limpyo ang konsensya sa usa ka lider ug walay nahimong crimes against humanity o genocide.