CAGAYAN DE ORO CITY – Sukwahi sa gikabalak-an, hapsay ug walay puwersang misupak sa demolition team kinuyugan sa mga pulis ug sundalo sa pagpangguba sa gatusang mga puy-anan sa duha ka lote nga tratado isip military reservation sulod sa Camp Edilberto Evangelista diin nakabase ang headquarters sa 4ID,Philippine Army sa Brgy Patag sa syudad sa tibuok adlaw.
Kini nunot sa kompirmasyon ni Lt Col Evan Viñas,tigpamaba sa Cagayan de Oro City Police Office o COCPO nga anaa sa 181 ka balay ang naguba sa demolition team nga sinugo sa korte aron mahawan na sa kabalayan ang maong parsel sa kayutaan.
Miingon si Viñas nga managsama nga nagpatuman sa maximum tolerance ang panig sa kapolisan ug ang mga residente nga apektado sa kamanduan sa korte rason nga nalikayan ang tensyon.
Una nang gimanduan sa korte suprema ang lower court nga ibalik na sa pagsilbing land military reservation ang duha ka lote rason nga gilugwa usab ang mando-demolasyon nga molungtad sa lima ka adlaw.
Ipadayon ang demolasyon hangtod pa sa adlaw’ng Sabado haom sa mando sa korte.
Hisayrang sobra 300 ka balay pa ang angay gub-on ayha hingpit mahawan ug mabalik sa pagdumala sa gobyerno pinaagi sa Philippine Army.
