CAGAYAN DE ORO CITY – Wala pa’y gilugwa nga pahayag ang kadagkuan sa Roads and Traffic Administration o RTA kabahin sa nag-viral video sa duha ka enforcers ug motorista nga nagsinumbahay sa gawas nga bahin sa parking area sa Gaisano Mall sa Recto-Corrales Streets ning syudad.
Kini aron ilhon kon kinsa ang maong RTA enforcers ingon man ang gikasumbagay nila nga motorista ug kon unsay rason sa maong bahug-bahog sa kinomo.
Makita ug madungog sa video nga kuha ni Jarl Cayano Jamors nga naninguha ang usa ka babaye nga i-aparta ang away apan wala nagpapugong ang duha ka panig ug nagbinayluay sila sa ilang mga kinomo.
Gilayong nabahin ang netizens nga nakakita sa video ni Jamors diin adunay mga misaway sa gipakitang taras sa RTA enforcers ug may mibatikos usab sa motorista ilabina nga gitoohan nila nga nakahimo kini’g paglapas sa lagda sa trapiko sa naka-temporary nga ‘one-way’ nga dalan ning panahona.
Misulti usab ang uban nga unta gitigbabaw sa maong RTA enforcers ang maximum tolerance ilabina nga dili armado o peligro ang motorista ug aduna pa’y mga pulis nga mi-aparta sa ilang away.
