CAGAYAN DE ORO CITY – Gitambagan ni Cagayan de Oro 1st District Cong. Lordan Suan ang sobra 21-mil ka bag-ong botante nga kalit namalhin sa Brgy Carmen nga likayan nga mobotar sa 2025.
Kini kon dili sila gusto madamay ug mag-atubang sa mga kaso kon masuta sa imbestigasyon nga nasupak nila ang balaod sa piliay sa nasud.
Namahayag si Suan nga mohimo kini’g diskurso niini sa pagbalik sa sesyon sa House of Representatives aron masayran nga apil ang Brgy Carmen nga dunay gitawag nga ‘statistical improbability’ nga nahitabo sa registration period ning tuiga.
Tipik sa gidudahan ni Suan nga kalit namalhin ang libuang mga botante kay nasaksihan nila ang grabe kadagko sa palit sa boto sa milabay’ng eleksyon sa brgy ug misaad pa nga pun-an sa sunod tuig nga piliay.
Nagkalawom ang panagribal sa politika sa distrito uno kay wala magdahom ang pamilyang Uy nga dunay lapad nga kontrol sa Brgy Carmen apan napukan sa pamilya ni Suan.
Hisayrang una nang nagporma ang Commission on Elections sa task force aron imbestigaran ang kalit nga pagsaka sa mga botante nga namalhin sa usa lang ka lugar sukad gisugdan ang rehistro sa miaging Pebrero ning tuiga.
