Gipasiguro ni Engr. Bernie Daba nga walay angay ikabalaka ang katawhan sa Cagayan de Oro kay bastante pa ang supply sa mga produktong agrikultura bisan pa sa kasamtangang mga hagit sa produksiyon ug merkado nga giatubang sa mga mag‑uuma ug mangingisda karong panahon sa krisis.
Sa interbyu sa Bombo Radyo, giingon ni Daba nga padayon ang hapsay nga pag‑abot sa suplay sa utanon, prutas, ug uban pang pagkaon gikan sa mga mag‑uuma tungod kay panahon sa cropping season.
Dugang pa niya, bisan pa sa epekto sa pagtaas sa gasto sa abono ug gasolina, nagpadayon gihapon ang koordinasyon sa lokal nga kagamhanan aron masiguro nga dili maapektuhan ang suplay sa merkado.
Gipasabot usab sa City Agriculture nga adunay giandam nga backup supply sa abono ug suporta gikan sa gobyerno alang sa mga mag‑uuma aron mapadayon ang produksiyon ug malikayan ang kakulang sa mga produktong agrikultura.
Padayon karon ang City Agriculture Office sa pagmonitor sa sitwasyon aron maseguro nga lig‑on ug igo ang suplay sa mga produktong agrikultura sa dakbayan.
