Gibarugan sa PDEA Region 10 nga kon nakadunggo man sa nasud ang kontrobersyal nga 3.5 billion pesos nga shabu shipment nga nabara sa Laos, siguradong ma-intercept gihapon kini sa ilang buhatan ug sa PNP. Gitin-aw ni PDEA Misamis Oriental Provincial Director Expedito Cardona Jr.
nga ang sunod-sunod nga pagkasakmit sa dagkong gidaghanon sa droga sa nasud usa ka ebidensya sa mas epektibo ug gipahait nga operasyon sa gobyerno.
Dugtong pa sa opisyal, dili kinahanglang mabalaka ang publiko tungod kay nagpakita lamang kini nga naglihok ang mga estratehiya ug subsob nga pakig-alayon sa foreign counterparts batok sa mga sindikato.
Hagit karon sa buhatan sa mga pamilya ug komunidad nga magmatngon ug motabang sa pagsumpo sa droga sugod sa mismong panimalay.
