CAGAYAN DE ORO CITY – Misaka pa sa upat ka empleyado sa gobierno ang nadakpan tungod sa pagsupak sa pagpatuman sa election gun ban sa Commission on Elections pinaagi sa checkpoints sa kapolisan ug kasundaluhan sa Northern Mindanao.
Namahayag si Major Joann Navarro,tigpamaba sa Police Regional Office 10 nga anaa sa 46 ka personalidad ang nadakpan gumikan sa paghupot sa mga mugbo ug pipila ka tag-as nga armas.
Siya miingon nga sa maong gindaghanon,naglakip kini sa duha ka aktibong pulis,sakop sa military ug taga-Bureau of Customs.
Mitala na usab sa 38 ang mga armas kinuyugan sa 289 ka mga bala nga apil nakompiskar sa mga otoridad.
Mitapos kini sa pag-ingon nga sa 46 ka dinakpan, 17 kanila ang pinaagi sa checkpoint sa Comelec samtang ang 29 ang nakuha nunot sa gilusad nga normal police operations.
