CAGAYAN DE ORO CITY – Gusto sa komitiba sa public works sa konseho nga ma-blacklisted ug mabawi ang minilyong salapi isip mobilization funds sa lima ka construction companies nga giingong nagpasagad sa ilang nakuha nga city infrastracture projects ning syudad.
Kini ang rekomendasyon nga gilugwa ni public works committee chairman SK Federation President Kag. John Michael Seno ngadto kang City Vice Mayor Jocelyn ‘Bebot’ Rodriguez nunot sa gitahas sa konseho nga pag-imbestigar sa sobra gatos ka proyekto sa panahon ni kanhi City Mayor Oscar Moreno sa dakbayan.
Miingon si Seno tipik sa maong mga kompanya ang MGB Builders nga wala mohuman sa katukuran sa House of Hope project;Edmond Ray Construction nga pakyas gihapon motibawas sa Carlo Paalam Boxing Gym;LG Lasacar Construction nga nag-trabaho sa Bugo Creek Bank Protection project;DL Builders nga may proyekto sa Ramonal Village sa Brgy Camaman-an ug Pyramid Consolidated Builders and General Merchandise.
Giklaro usab ni Seno nga ang pagtumbok sa maong mga construction company ang iyang gibasi sa mga dokumento gikan sa resident engineers sa city engineering office sa dakbayan.
Apan gisupo ni Majority Leader Kag. Edgar Cabanlas ang maong sugyot.
Kini tungod kay wala moagi sa due process ang maong sugyot kay nagbasi lamang si Seno sa gisulti sa pipila ka resident engineers sa engineering office sa dakbayan.
Gikakurat usab ni Cabanlas kon nganong atol sa gihimong imbetigasyon,wala gyud makuhai’g panig ang maong mga kontraktor aron may tubag sila kabahin sa isyu.
