CAGAYAN DE ORO CITY – Napatay sa operasyong-militar ang dugang tulo ka sakop sa gitoohang teroristang Dawlah Islamiyah- Maute ug ubay-ubay usab ang samaron sa laing hugna sa engkuwentro sa Barangay Ramain,Munai,Lanao del Norte.
Namahayag si AFP chief of staff General Romeo Brawer Jr nga milusad ang tropa ni 1st ID commander Maj Gen Gabriel Viral III pinaagi sa 44IB ug Scout Ranger Battalion sa ‘decisive operation’ batok sa 15 ka terorista hinungdan sa dugu-ong sinukliay sa mga bala.
Samtang subo usab giangkon sa Armadong Kusog sa Nasud nga anaa sa unom sa ilang mga sundalo ang mibuhis kinabuhi aron pagpuhag sa nabiling DI-Maute kinsa responsable sa kamatayon sa 4 ka sibilyan ug daghan ang samaron sa bomb attack sa Mindanao State University Marawi niadtong Disyembre 2023.
Panganti ni Brawner nga dili mohunong ang tropa sa estado hangtod nga makuha ang katapusang sakop sa maong grupo aron hingpit mahatag ang hustisya sa bombing incident sa Marawi City.
Sa pikas bahin,kasamtangang gidala sa military hospital ang mga samarong sundalo gikan sa maong engkuwentro.
Hawid usab sa militar ang tulo ka tag-as nga kalibre sa armas nga iya sa napatay’ng mga terorista sa lugar.
Dumduman nga ang maong operasyong-militar sumpay sa sunod-sunod nga engkuwentro batok mga terorista diin tipik si Khadafi Mimbesa alyas ‘Engineeer’ sa siyam nga napatay sa lungsod sa Piagapo,Lanaol del Sur sa miaging Enero 25-26 ning tuiga.
