(Update) CAGAYAN DE ORO CITY-Nasubo ang katawhan sa kasayuran nga ilang nakuha nga namatay na tungod sa atake sa kasingkasing ang giila nga ‘longest serving mayor’ sa Cagayan de Oro City kagabii.
Kini human kumpirmaha sa pamilya nga namatay sa cardiac arrest si kanhi CdeO City Mayor Pablo ‘Ambing’ Magtajas sa edad nga 77 anyos samtang gitabang sulod sa intensive care unit sa Cagayan de Oro Medical Center ning syudad kagabii.
Gibutyag ni City Councilor Dr Reuben Daba nga unang nakasinati sa pagpanakit sa dughan si Magtajas hinungdan nga gidali pagdala sa ospital kagahapong adlawa.
Apan sunod-sunod nga nakasinati sa cardiac arrest si Magtajas samtang anaa sa ICU hangtod nga hingpit nahunusan sa kinabuhi sa pag-abot sa 8:30 kagabii.
Dugtong niini,gikakurat ug gikaguol pag-ayo sa libuang katawhan ang ilang nasayran nga kamatayon sa kanhi opisyal nga ilado usab nga tigpanalipod sa mga yano nga mamumuo dinhi sa syudad.
Gitakdang ihaya ang patay’ng lawas ni Magtajas sa Cosmopolitan Funeral Homes sa Capistrano Street ning syudad.
Wala pa’y gihatag nga schedule ang pamilyang Magtajas kon kanus-a i-abli alang sa publiko ang haya niini sa maong punerarya.
Nagsugod ang ang political career sa tuig 1984 igo paghuman sa administrasyon ni kanhi senate president ug ex-city mayor Nene Pimentel.
Si Magtajas ang naila nga longest serving mayor tungod kay gikan sa tuig 1984 natapos ang iyang termino sa syudad tuig 1998.
