CAGAYAN DE ORO CITY- Tukuron ug suportado sa Regional Peace and Order Council o RPOC-10 ang Task Force Oro nga gitumong paghatag sa seguridad sa katawhan dinhi sa syudad.
Kini tungod sa dakong bahad nga sudlan usab sa mga teroristang ISIS-Maute aron hasi-on ang kahusay’g kalinaw sa dakbayan sama sa nahitabo sa Marawi City.
Gipasalig ni RPOC chairman City Mayor Oscar Moreno nga dili tugutan sa militar ug kapolisan nga makaabot ang kagubot sa Marawi City dinhi sa syudad.
Una nang nasikop sa sunod-sunod nga operasyon sa Martial Law Special Action Group o MLSAG ang mga sakop sa teroristang ISIS-Maute nga nanibat gikan sa nagkagubot nga Marawi City ug nagtago dinhi sa syudad sukad pa sa miaging semana.
