CAGAYAN DE ORO CITY-Misaka pa sa kapin 20 ka Internally Displaced Person o IDPs ang namatay sulod sa evacuation sa Marawi City.
Kini ang gibutyag ni Department of Health Sec Jean Paul Ubial atol sa iyang pagbisita sa gi-atake nga syudad.
Matud ni Ubial mitala gilayon silag tulo ka bakwit nga namatay tungod kay nagdumili nga magpahiling sa ilang gibati nga sakit sukad pa sa miaging adlaw’ng Lunes.
Subli, namugos si Ubial nga wala sila magkulang tungod kay daghang mga doktor ug nurses ang gatuyok sa mga evacuation centers aron hatagan sa first aid ug tambal ang mga nagsakit samtang gipadala sa ospital ang nagbaton sa delikadong balatian.
Subay sa data sa DoH-Marawi, anaa na sa 2,013 ka bakwit ang milanding sa hospital diin 27 kanila ang namatay tungod sa dehydration kon grabeng kauhaw ug grabeng pag-ubo nga nagresulta sa pneumonia.
Nagpabiling top 5 ka uso nga sakit sa mga evacuation center sa Marawi ang upper respiratory tract infections kon pag-ubo, skin disease kon katol katol sa pamanit, hypertension sa mga katigulangan, acute respiratory infection kon hubak, ug acute watery diarrhea kon kalibanga.
