CAGAYAN DE ORO CITY-Nagpabilin si Mayor Oscar Moreno sa iyang puwesto bisan gipahamtangan sa dismissal order sa Ombudsman tungod sa kasong kurapsyon.
Kini human nakakuha’g temporary restraining order o TRO sa Court of Appeals o CA Mindanao Station sulod sa duha ka bulan aron pugngan ang paglangkat kaniya sa pagka-mayor.
Gikompirmar ni DILG regional director Arnel Agabe nga napakyas usab sila sa pagsilbi sa kamanduan sa Ombudsman tungod sa giingong gisubay nga proseso sa ilang buhatan.
Una niini,emosyonal nga gipasalig ni Moreno nga dili mahitabo nga iyang budhian ang gihatag pagsalig kaniya gikan sa katawhan hinungdan nga gipakigbatukan niya ang pagtangtang kaniya sa Ombudsman.
Samtang gitahod sa complainant nga si Antonio Nunez Jr ang mando sa korte nga pugngan ang pagtangtang sa puwesto kang Moreno.
Kini bisan nga nakit-an sa Ombudsman nga may gimbug-aton ang iyang reklamo nga kurapsyon batok kang Moreno sa panahon nga nagsilbi pa kining gobernador sa Misamis Oriental.
Gihimo nga basehan ni Nunez pagkaso kang Moreno ang transaction kaniadto nga gisudlan sa lalawigan nga wala moagi sa public bidding bisan tin-aw nga gimando sa balaod.
Dugtong niini,gibutyag sa chief legal counsel ni Moreno nga si Atty Dale Brian Mordeno nga moduso sila’g motion sa korte aron pangayo-on ang writ of preliminary injunction o WPI aron hingpit pugngan ang mando sa Ombudsman.
