CAGAYAN DE ORO CITY-Patay ang empleyado samtang laing lima ang samaron sa pagbangga sa wing-van nga gipanag-iya ni provincial board member Jigjag Pelaez diha sa Brgy Sumalag,Kinoguitan,Misamis Oriental kagabii.
Giila ang namatay nga si Sofronio Telonos nga trabahante sa Acselom Resources Corporation nga maoy nagpalit sa mga unod sa lubi nga gikarga van.
Matud ni Kinoguitan Police Station commander Sr/Insp Marebeth Ramoga nga naangol usab ang driver ingon man ang helper sa van nga sila si Frank Salingay nga taga-Gingoog City ug Alexander Cabanero nga nagpuyo sa Talisayan ning lalawigan.
Si Ramoga miingon nga posibleng nawad-an sa brake ang van hinungdan nga gisungag usab niini ang upat ka balay diin nagresulta pagka-angol sa mga tagbalay.
Kabahin sa nadala sa Northern Mindanao Medical Center sila si Michael Lugti;Edwin Toremocha;Emilia Calustre ug usa ka nag-apelyido nga Acero.
