CAGAYAN DE ORO CITY-Nagdumili ang Philippine Coast Guard Northern Mindanao pag-uli sa trenta’y dos punto otso milyon pesos nga salaping cash nga unang nabawi gikan sa United Coconut Planters Bank o UCPB-Velez Branch sa syudad sa miaging semana.
Kini bisan nga nabasura ang kasong rebellion nga gipasaka batok sa tulo ka empleyado ug laing duha ka security escorts bangko sa piskalya ning syudad.
Gibutyag ni PCG Northern Mindanao District deputy commander Troy Cornellio nga padayon ang ilang pag- imbestigar kuyog ang Bangko Sentral ng Pilipinas o BSP sa posibleng tinud-anay nga tag-iya sa maong salapi.
Namugos si Cornellio nga kabahin lamang sa ilang trabaho ang pagkasapon sa maong salapi nga tuyo dad-on sa Cebu City pinaagi pagsakay unta sa Trans
Asia nga barko diha sa pantalan sa dakbayan.
Samtang dili una prioridad sa United Coconut Planters Bank o UCBP-Velez Branch ang mohimo’g bisan unsa nga posibleng legal action batok sa PCG Northern Mindanao.
Kini human nasitar ang ilang mga personahe nga nagdala’g minilyong salapi nga gisulod sa karton nga padulong sa Cebu City sa miaging semana.
Gibutyag sa legal counsel sa UCPB nga si Atty Alvin Calingin nga suportado nila ang martial law ni Pres Rodrigo Duterte sa Mindanao apan unta isiguro sa mga otoridad ang pag-hold sa mga tawo nga nagdala’g peligro sa seguridad sa publiko.
Namugos si Calingin nga dili ilegal ang pagdala’g kuwarta sa iyang mga kliyente kay normal lamang kini nga transaction sa maong bangko.
