CAGAYAN DE ORO CITY-Gitun-an na karon sa kampo sa United Coconut Planters Bank o UCBP ang ilang lakang nga himoon batok sa mga personahe sa Philippine Coast Guard o PCG-Northern Mindanao.
Kini human ma-imbargo sa PCG-Northern Mindanao ang P38 milyon pesos ug laing 18-mil dolyares nga salapi gikan sa maong bangko aron unta dad-on sa Cebu City sa miaging semana.
Matud sa abogado sa UCPB nga si Atty Alvin Calingin nga may nahimo nga damyos ang pagka-estangko sa maong salapi ilabina nga gikan kini sa ilang mga kliyente.
Kini ang hinungdan nga gihulat nila ang kamanduan sa ilang mga labaw alang sa sunod nga aksyon nga himoon.
Nag-atubang sa kasong rebellion apan nabasura sa piskalya ang mga personahe sa bangko tungod sa pagpalusot sa pantalan sa syudad nga padulong unta sa Cebu City niadtong Hunyo 25 ning tuiga sa gabii.
Samtang wala kalisangi sa PCG-Northern Mindanao ang mahimong lakang sa taga- UCPB nga sila kasuhan sa pag-embargo sa minilyong salapi nga gipalusot sa pantalan sa Brgy Macabalan sa syudad padulong sa Cebu City sa miaging semana.
Matud ni PCG Northern Mindanao District Deputy Commander Troy Cornelio nga katungod sa UCPB nga mohimo sa unsa’y ilang gitoohan kay nagsunod lamang usab sila sa mando gikan sa korte.
