CAGAYAN DE ORO CITY- Gitun-an karon sa militar ug kapolisan ang sitwasyon sulod sa war zone kon angay pa nga ipadayon ang gahom sa martial law sa Mindanao.
Kini human anaa na lamang sa kapi’g 80 ka sakop na lamang ang giingong naglihok ug nakigbatok sa militar sa upat ka brgy sa Marawi City,Lanao del Sur.
Miingon si Defense Sec Delfin Lorenzana nga kuyog ang kapolisan ila gitutalimbang ang sitwasyon aron mahimu-ag ebalwasyon ug rekomendasyon nga iduso nila kang Pres Rodrigo Duterte.
Samtang pursigido si PNP chief Dir Gen Ronald de la Rosa nga lugwayan pa ang gahom sa martial law sa Mindanao ilabina sa Marawi City.
Kini samtang wala pa mahurot pagkasikop ang tanang miembro sa teroristang Maute-ISIS ug supporters niini nga nagtagu-tago sa nagkadaiyang bahin sa nasud.
Kumbinsido si De la Rosa nga tungod sa martial law napadali sa kapolisan ug militar ang pagpangdakop sa mga terorista diin partikular dinhi sa syudad,daghan na ang nangasikop.
Samtang gisupak sa political analyst nga si Atty Antonio Soriano sa grupong Citizens Watch for Good Governance o CWGG nga magdugay pa ang martial law sa Mindanao.
Si Soriano miingon nga dili na rebellion ang nahitabo sa Marawi City apan simple nga kreminalidad na lamang.
Giangkon ni Soriano nga may maayo nga nahatag ang martial law apan dili usab matago nga nahatag kini’g dili maayo nga epekto sa ekonomiya ug turismo sa nasud.
Pabor usab kini nga ipabilin ang suspension sa writ of habeas corpus o pagdakop sa mga terorista nga dili una mogamit sa warrant of arrest ang mga otoridad.
