CAGAYAN DE ORO CITY- Gikalipay sa usa ka person with disabilities ang bag-ong cratches nga iyang dawatan gikan sa Bombo Radyo pinaagi sa Bombo Medico 2017.
Sumala sa benepisyaryo nga si Jocelyn Sinadjan, 47-anyos nga taga Brgy Bulua ning syudad nga walay kabutangan sa iyang kalipay tungod kay magbaton na kini’g bag-ong crutches.
Nagpasalamat si Sinadjan sa sponsors tungod sa pagtabang kanila nga PWDs nga mahimong komportable sa ilang paglakaw.Samtang wala ka tulog tungod sa ka-excited ang benepisyaryo nga si Quennie Fuentes, 34-anyos nga taga Brgy Tablon ning syudad.
Kini tungod kay nahingpit nang naibtan sa daot nga ngipon si Fuentes atol sa Bombo Medico 2017 sa gym sa Capitol University ning syudad.
Giangkon ni Fuentes nga naghinamhinam na siya nga makapaibot sa iyang ngipon nga libre. Gani, gusto pa niini nga hutdon pag-ibot ang iyang mga ngipon aron pahimuslan ang kahigayonan sa free dental services sa Bombo Medico 2017.
Sa pikas bahin,gipasalamatan usab ni Eddie Reycetez, 67-anyos nga taga Brgy Calaanan ning syudad ang tanang volunteer doctors, dentists ug nurses nga milambigit sa Bombo Medico 2017.
Si Reycetez miingon nga nalipay siya tungod kay ma-abi abihon ug bootan ang tanang mga doktor.
Nagpasalamat usab siya sa Bombo Medico tungod kay matul-iran na ang problema niya sa mata nga dugay na niyang giantos.
Gani,walay kabutangan sa gibating kalipay ni Jocella Rivera, 61-anyos nga taga Brgy 27 ning syudad ang libreng reading eyeglasses nga iyang nadawatan sa Bombo Medico 2017.
Sumala ni Rivera nga matag tuig niya nga gihulatan ang free medical and dental services sa Bombo Radyo tungod kay mao usab kini ang kahigayonan nga mapulihan ang iyang eyeglasses.
Mapasalamaton si Rivera tungod kay makadawat na usab siya og bag-ong eyeglasses nga libre ning tuiga.
