CAGAYAN DE ORO CITY- Patay ang duha ka tawo ang namatay tungod sa pagka-igo sa diarrhea outbreak diha sa lungsod sa Medina,Misamis Oriental.
Kini human unang nakainom sa kontaminado sa bakterya nga tubig mainom ang 400 ka residente nga gikan sa upat ka brgy sa maong lungsod.Mismo si Vice Gov Joey Pelaez ang mihimo’g pakisusi diin nasuta nga may mga daot ang mga tubig hinungdan nga nasudlan sa kagaw ang water pipes nga iya sa Medina Rural Water Works Sanitation Cooperative o MERWASCO.
Una niini,mismo si Gov Bambi Emano ang mitahas kang Misamis Oriental Provincial Health Officer Dr Jerie Calingasan nga tabangan ang pag-imbestigar diin ilang nakompirmar nga may pipila na sa mga pasyente ang nangamatay.
Samtang naghulat pa ang Dept of Health o DoH-10 sa opisyal nga resulta sa laboratory tests sa water sampling nga gikuha sa ilang inspection team gikan sa mga tubo sa Medina Rural Water Works Sanitation Cooperative o MERWASCO.
Kini aron masuta kon mismo ang ilang tubig nga giinom sa gatusang katawhan ang hinungdan sa diarrhea outbreak sa upat ka brgy sa Medina,Misamis Oriental sa miaging semana.
Gibutyag ni Nur Ian Caridad,DoH-10 Health and Education Promotion Officer nga gipadala pa nila sa kauluhan ang sampling aron ipaubos sa pakisusi sa ilang mga eksperto.
Sa pikas bahin,nagdumili paghatag komento ang nadestino nga rural health unit officer kabahin sa pagka-ospital sa gatusang mga residente sa Medina,Misamis Oriental.
Kini human nauyunan nga bugtong si Medina Mayor Dan Chan na lamang ang mohatag sa mga pahayag atubangan sa media kon makisayod sa hitabo.
Gibutyag ni Medina rural health unit officer Dr Alma Pelaez-Enriquez nga nangayo siya’g pasaylo sa publiko tungod usab sa iyang pagtahod sa kamanduan sa ilang mga opisyal.
Hinoon,nasayod si Dr Enriquez sa panghitabo apan limitado lamang ang iyang pahayag tungod sa protocol nga ilang gisunod sa lungsod.
Una niini,gibutyag ni Medina Municipal Administrator Ariel Angjay nga gilayon nila gipatawag ang kadagkuan sa Marwasco aron makahatag katin-awan kon luwas pa ba ang ilang tubig nga imnon sa katawhan sa ilang lungsod.
