CAGAYAN DE ORO CITY-Naghatag sa seguridad sa mga negosyante ug pagpaubos sa kreminalidad ang deklarasyong martial law sa Mindanao.
Kini ang pag-depensa ni NEDA Sec Gen Ernesto Pernia sa laraw ni Pres Rodrigo Duterte nga lugwayan ang martial law sa Mindanao kutob Disyembre 31 ning tuiga.
Gibutyag ni Pernia nga gamay’ng porsiento lamang sa katibuk-ang economic activities lamang ang apektado sa kagubot sa Marawi City hinungdan nga imposible nga nalugi ang ubang bahin sa Mindanao.
Gani,mismo ang mga negosyante dinhi sa syudad ang nagsulti kaniya nga mas luwas sila batok sa mga kreminal tungod sa kahugot sa seguridad sa palibot.
Samtang supakon na sa Oro Chamber of Commerce kon ipataas pa sa gobierno ang martial law sa Mindanao.
Gibutyag ni Oro Chamber Pres Roberto Pizarro nga gisunod nila ang kagustuhan sa gobierno tungod kay nasabtan niini ang sitwasyon sa Marawi City.
Apan miingon si Pizarro nga sobra kataas na ang martial law kon ipaabot pa sa Disyembre 31 ning tuiga ilabina nga naka-sentro ang operasyon sa militar sa Marawi City,Lanao del Sur.
