CAGAYAN DE ORO CITY- Gikalipay sa kadagkuan sa local govt unit officials ingon man sa mga residente nga hugot pang kapanalipdan ang ilang seguridad batok sa peligro nga dala sa teroristang Maute-ISIS sa Marawi City,Lanao del Sur.
Gibutyag kini Lanao del Sur Provincial Crisis Committee spokesperson Zia Alonto Adiong tungod sa padayong martial law implementation ni Pres Rodrigo Duterte sa Mindanao.
Namahayag si Adiong nga kabahin sila nga magbantay ug mogukod sa militar ug kapolisan kon ugaling adunay kaso sa mga pag-abuso sa tawhanong katungod ngadto sa mga sibilyan ilabina sa Lanao del Sur ug Marawi City.
Samtang kapukanan sa hingpit sa teroristang Abu Sayyaf Group ug Maute ang rason kon nganong suportado ni Iligan City Lone District Rep Frederick Siao ang martial law extension alang sa Mindanao.
Kini ang pagpasabot ni Siao sa katawhan dihang mihatag kini sa iyang suporta atol sa dungan nga pagtuki sa kongreso sa hangyo ni Pres Rodrigo Duterte sa martial law kagahapong adlawa.
Namugos si Siao nga tupad lamang ang Iligan City sa gikonsiderar nga sentro sa kagubot sa Marawi City diin daghang bakwit ang nagpasilong kanila hinungdan gipaluyuhan niini ang martial law extension.
Sa pikas bahin,dili makatugot si Cagayan de Oro 2nd District Rep Maxi Rodriguez Jr nga mahisama sa kagubot sa Marawi City ang dakbayan.
Kini ang hinungdan kabahin si Rodriguez sa mga kongresista gikan sa Northern Mindanao nga misuporta sa extension sa martial law.
Namahayag si Rodriguez nga dako pa ang problema sa Marawi City hinungdan nga dili angay pasagdan sa gobierno ang mga terorista nga padayon sa ilang mga pagpanghasi sa Mindanao.
Dugtong niini,kumbinsido si Camiguin Lone District Rep Xavier Jesus Romualdo nga angay lamang malugwayan ang martial law sa Mindanao.
Kini human napasabot pag-maayo sa kadagkuan sa militar ingon man sa taga-Malakanyang kon nganong angay ihatag sa kongreso ang gipangayo ni Pres Rodrigo Duterte nga gahom aron pagpulbos sa mga teroristang pundok ilabina sa Marawi City.
Gani,tuyo usab niya nga mahatagan sa igong proteksyon ang katawhan sa Camiguin nga target sa bahad sa mga terorista nga ilang sudlon.Samtang gipanghimaraut sa pipila ka aktibistang pundok ang extension sa Martial Law dinhi sa Mindanao.
Kini human moabot sa 261 ka magbabalaod ang mipabor sa extension samtang 18 lamang ang supak atol sa botasyon sa kongreso kagahapong adlawa.
Gibutyag ni Bayan Northern Mindanao Sec Gen Wildon Barros nga gikondenar nila ang martial law ug ilabina ang paglugway pa niini ni Pres Rodrigo Duterte.
