CAGAYAN DE ORO CITY-Pasado ang kapi’g tuig ni Pres Rodrigo Duterte nga pag-serbisyo sa katawhan alang sa pipila ka public officials ning syudad ug lalawigan.
Kini human giyagyag ni Pres Duterte ang iyang ikaduha nga state of the nation address o SONA sa kauluhan kagahapong adlawa.
Namahayag si Regional Peace and Order Council o RPOC chairman City Mayor Oscar Moreno nga partikular nga nakit-an niya ang pag-irog sa macro-economics sa nasud.
Gihadom usab ni Moreno nga masulbad na ang suliran sa terorismo sa Mindanao ilabina ang kagubot sa Marawi City.
Samtang nagpakita sa sensiro nga pag-alagad si Pres Rodrigo Duterte sa katawhan sulod sa kapi’g tuig niya nga katungdanan sa gobierno.
Kini ang hinungdan nga gihatagan ni Misamis Oriental Gov Bambi Emano sa gradong otso si Pres Duterte atol sa iyang gihimong report sa SONA atubangan sa katawhan kagahapon sa hapon.
Hinoon,medyo wala matagbaw si Emano sa paghishot ni Duterte sa plano niini sa proyektong imprasktura diin siyete ang nahatag niya nga grado niini.
Samtang nakulangan si kanhi Senate Pres Nene Pimentel Jr sa pagtuki ni Pres Rodrigo Duterte sa topiko sa pederalismo atol sa iyang kapi’g duha ka oras nga SONA sa kauluhan kagahapon sa hapon.
Hinoon,gihatagan usab ni Pimentel si Duterte sa pasadong grado nga siyete tungod sa maayo nga pagdumala niini sa nasud.
Gani,gikalipay usab ni Pimentel ang paghisgot ni Duterte sa mga bililhong kapanaryo nga gipangkuha sa Amerika nga i-uli na sa Pilipinas nga gipanag-iya sa katawhan sa Balangiga,Easter Samar sa tuig 1901.
Sa pikas bahin,natagbaw nga gikulangan si Iligan City Lone District Rep Frederick Siao sa unod sa SONA ni Duterte sa iyang kapi’g usa ka tuig nga serbisyo sa katawhan.
Nagbutyag si Siao nga gusto unta niya madunggan kang Duterte ang economic revival policy ilabina nga apektado ang Mindanao tungod sa martial law gumikan sa kagubot sa Marawi City.
Apan lagpak nga grado ang gihatag sa ilado nga kritiko ni Duterte nga si Magdalo partylist Rep Gary Alejano sa unod sa iyang ikaduhang SONA.
Kini tungod kay bugtong kampanya batok illegal nga droga lamang ang nakit-an lamang ni Alejano nga gihinambog ni Duterte nga gisaad sa unang SONA niini.
Maglisod si Alejano paghatag sa porsiento o grado tungod kay nagtuyok-tuyok lamang si Duterte sa paghisgot sa anti-illegal drugs operation ubos sa iyang administrasyon.
Hagbong nga grado gihapon ang gihatag sa grupong League of the Filipino Students o LFS-Northern Mindanao ang unang tuig ni Pres Rodrigo Duterte.
Gibutyag ni Kristine Cabardo, presidente sa LFS-Northern Mindanao nga wala natuman ni Pres Duterte ang iyang mga saad sama sa pagtapos sa endo ug kontraktualisasyon sa trabaho, paghatag sa libreng edukasyon sa kolehiyo,mga lumad napasagdan ug misamot ka miserabli ang kahimtang sa mga Moro tungod sa walay hunong nga airstrike sa Marawi City.
Gikan sa 100% agig pinakataas,gihatagan lamang sa kapin libo nga mga sakop sa LFS si Pres Duterte sa grado nga 30%.
Samtang hataga’g higayon sa grupong Associated Labor Union-Trade Union Congress of the Philippines o ALU-TUCP Northern Mindanao si Duterte sa pagpadayon niya sa iyang serbisyo sa katawhan.
Gibutyag ni ALU-TUCP regional vice chairman Nick Borja nga tungod kini sa pagkabalda sa pokus ni Duterte nga epekto sa kagubot sa Marawi City.
Singlon sa maong grupo si Duterte sa isyu sa kontraktuwalisasyon ug end of contract sa panahon nga mahupay na ang martial law sa Mindanao.
Gradong otso ang gihatag sa grupo ni Borja sa unang tuig ni Duterte.Samtang prangka ug matinud-anon ang nahimong unod sa SONA ni Duterte nga gipaminaw sa minilyong katawhan sa nasud kagahapong adlawa.
Kini human gituki ni Pres Duterte ang daghang mga isyu nga nagkinahanglan sa dinalian nga pagtubag sa serbisyo sa gobierno.
Namahayag si Msgr Rey Monsanto,consultor sa Archdiocese of Cagayan de Oro nga kon siya ang ipahatag sa grado,hagatan niya si Duterte sa nuebe tungod sa tinguha niini nga masulbad ang mga problema sa nasud.
