CAGAYAN DE ORO CITY-Gipadu-ol pa sa kapolisan ang ilang paghatag serbisyo sa katawhan nga nagkinahanglan sa panabang ilabina panahon sa emerhensiya ning syudad.
Kini human opisyal nang gibalhin sa liderato sa Cagayan de Oro City Police Office o COCPO ang ilang opisina sa bag-ong PNP building diha sa Brgy 40 sa syudad.
Gibutyag ni COCPO spokesperson C/Insp Mardy Hortillosa nga mismo sila si PNP regional director C/Supt Tim Pacleb ug Regional Peace and Order Council o RPOC chairman City Mayor Oscar Moreno ang misaksi sa pag-abli ug blessing sa bag-o nila nga opisina.
Hinoon,pabiling magamit gihapon sa kapolisan ang Maharlika Headquarters nga nahimutang diha sa Brgy Carmen sa dakbayan.
Samtang gihagit ni Moreno ang kapolisan ug militar nga ipalig-on ang kahusay’g kalinaw sa syudad.
Kini kon nagtinguha ang katawhan sa pagpuyo nga malinawon batok sa mga bahad sa kreminalidad.
Gihimo ni Moreno ang pahayag inubanan sa dakong pagpalasamat atol sa opisyal nga pag-abli alang sa publiko sa bag-ong COCPO building diin nag-opisina si City Police Director Sr/Supt Roy Bahian.
