CAGAYAN DE ORO CITY-Ipatawag sa konseho ang tanang”tricab drivers” ning syudad.Gibutyag ni City Council Asst Majority Floor Leader Teodulfo Lao Jr. kinsa naghupot sa komitiba sa Energy and Public Utilities nga matawag nga ilegal ang pagbiyahe sa mga tricab tungod kay wala man silay mga prangkisa.
Nagpasabot kini nga dili luwas ang tanang musakay sa maong matang sa transportasyon.
Gitin-aw ni Lao nga wala pay gipalugwa nga bisan usa ka permit ang konseho ning syudad aron makadagan ang mga traykab.
Sa umaabot nga sesyon lakip nga ipatawag sa komitiba ni Lao ang mga tinugyanan sa LTO, LTFRB, Roads and Traffic Administration ug ang mga tag-iya sa tricab.Gusto ni Lao nga hatagan sa regulasyon ang pagpadagan sa mga tricab sa kadalanan ning syudad.
Una niini, gitin-aw ni Lao nga wala pa silay nadawatan nga mga reklamo batok tricab apan, usa kini sa suhestiyon ni LTO regional director Oscar Salcedo nga tun-an sa konseho ang regulasyon sa maong matang sa transportasyon.
Samtang mihatag katin-aw si Salcedo batok sa operasyon sa mga traykab sa nagkadaiyang dalan ning syudad.
Gibutyag ni Salcedo nga dili mga pasahero ang nagpadangat kanilag mga reklamo apan ang mga motorela ug
jeepney drayber nga nakuhaan sa mga pasahero kay gihakot na sa mga traykab.
Gitin-aw ni Salcedo nga mahimong makakuha sa lisensya para sa sakyanan ang mga tag-iya sa tricab apan gidili ang pagpanguha ug pasahero tungod kay wala man silay mag prangkisa.
Subli, miingon si Salcedo nga wala nagpalugwa ang LTFRB ug bisan ang ilang buhatan para sa prangkisa sa
mga traykab.
Kini ang hinungdan nga iyang gihangyo ang konseho sa syudad nga tun-an ang regulasyon sa maong matang sa
transportasyon.
