CAGAYAN DE ORO CITY-Nasikop sa hiniusang operasyon sa tropa sa PDEA-13 ug PDEA-10 ang bag-ong nagsilbing lider sa Sangcopan Drug Syndicate nga naglihok sa Caraga Region sa Brgy Malanang,Opol,Misamis Oriental.
Kini human gi-ronda sa maong ahensiya subay sa search warrant sa korte ang tulo ka andana nga pinuy-anan nga nag-resulta pagkasikop ni Jehar Agar Sangcopan alyas Ukad kagahapon sa hapon.
Gibutyag ni PDEA agent Ben Calibre nga mismo ang PDEA-Caraga ang nag-apply sa search warrant aron masikop si Jehar kinsa mihulip sa nabiyaan nga dapit sa iyang amahan nga si Jabbar Sangcopan isip lider sa ilang grupo sa Caraga Region.
Nabawi gikan kang Sangcopan ang 10 gramos nga shabu diin nagbalor sa P60-mil.
Samtang nagdungoy-ngoy nga gihimakak ni Sangcopan ang pasangil sa PDEA nga nagpadayon kini sa pagbaligya’g gidiling droga dinhi sa Amihang Mindanao.
Kini human gisikop si Sangcopan tungod sa subli pagpamaligya’g shabu samtang nagtagu-tago diha sa CitiHomes Subd,Brgy Malanang,Opol ning lalawigan.
Giangkon ni Sangcopan nga nalambigit kini kaniadto apan human mapatay ang iyang amahan ug pagkasikop sa inahan niini,hingpit na mibiya sa ilegal nga kalihukan.
Gani,nagtungha na kini sa kursong criminology sa usa sa mga unibersidad sa syudad.
Una niini,gikakurat ni Malanang Brgy Kap Seno Dragon nga giila diay sa PDEA nga high value target ang pamilyang Sangcopan nga anaa lamang nanimuyo sa ilang dapit.
