CAGAYAN DE ORO CITY-Gilapdan sa Martial Law Special Action Group o ML-SAG ang ilang operasyon batok sa suspected gun smuggler nga gi-ronda apan naka-ikyas sa pinuy-anan niini sa Mindanao Homes Subd sa Brgy Pagatpat sa syudad.

Kini human gisilbi sa ML-SAG ang court search warrant batok kang Jalaludin Bacaraman Lao tungod sa pagbaton sa nagkadaiyang klase sa mga armas.

Gibutyag ni 4th ID,Philippine Army spokesperson Capt Joe Patrick Martinez nga maoy gidala sa ML-SAG alang sa imbestigasyon ang kapikas ni Lao nga si retired Police Supt Estrella Valleramos.

Nakuha gikan sa pinuy-anan ni Lao ang M4 rifle,duha ka kalibre 45 ug 38 revolver.

Samtang hayan mauli ra’g balik sa pamilyang Tago ang mga armas nga gikompiskar sa ML-SAG sulod sa ilang pinuy-anan diha sa Zone 5,Brgy Bonbon ning syudad.

Kini human naka-presentar ang mga igsoon ni Jabbar Tago sa mga dokumento diin nagmatood nga legal ang ilang gihuptang mga armas.

Namahayag si Martinez nga target sa pagronda si Jabbar apan wala nila kini makuha kay atua sa kauluhan.

Gidala alang sa imbestigasyon ang kapikas ni Jabbar nga si PO3 Joan Tago ug laing igsoon niini tungod nakuha gikan kanila nga M4 rifle,AK-47 rifle ug 10 ka kalibre 45 nga armas.

Una niini,namugos ang igsoon ni Jabbar nga si Jamira Tago nga kumpleto sa papeles ang ilang mga armas nga gigamit nila isip proteksyon ilabina nga nanag-iya sila’g dakong negosyo ning syudad.