CAGAYAN DE ORO CITY- Misaka pa sa 15 ang patay sa pagronda sa CIDG-10 inabagan sa Ozamiz City Police Station sa pipila ka pinuy-anan nga gipanag-iyahan sa pamilyang Parojinog sa Ozamiz City,Misamis Occidental.
Kini human gisilbi sa mga otoridad ang unom ka court search warrants diin nag-resulta sa kamatayon sa magtiayong City Mayor Aldong ug Susan Parojinog ug laing 13 pa sa magkalahi nga pinuy-anan sa maong syudad kagahapon sa kadlawon.
Gibutyag ni Ozamiz City Police Station commander C/Insp Jovie Espenido nga daghang nakuha nga armas,salapi ug shabu ang narekober sa pinuy-anan ug farm sa magtiayong Parojinog ug kang Vice Mayor Nova Princess Parojinog-Echavez.
Kini ang rason nga gitun-an nila’g maayo ang pagsulod sa tugkaran sa mga Parojinog tungod kay kanunay kining nabullet sa mga bisitang media ug mga anaa sa relihiyosong sektor.
Samtang gi-depensa ni Espenido kon nganong gisilbi nila ang unom ka warrant of arrests batok sa pamilyang Parojinog.
Namugos si Espenido nga tuyo niini nga dili mabalda ang operasyon ug kalikayan nga daghang sibilyan ang madamay kon ugaling adunay mahitabo nga pagpinusilay.
Tubag kini ni Espenido batok sa giingong pagbatikos ni Senate Minority Leader Franklin Drilon kon nganong kadlawon ug dili adlawan ang pagsilbi sa mando sa korte.
Namugos usab si Espenido nga dili ordinaryo nga pamilya ang mga Parojinog diin nagbaton sa daghang armadong bantay hinungdan nga gitunong nila sa kadlawon ang operasyon.
