CAGAYAN DE ORO CITY-Gipatay’g tuyo sa kapolisan ang magtiayong Mayor Reynaldo Aldong Sr ug Susan Parojinog ingon man si Board Member Octavio Parojinog Jr sulod sa ilang pinuy-anan sa Brgy San Roque Lawis,Ozamiz City,Misamis Occidental sa miaging kadlawon sa Domingo.

Kini ang testimonya sa sakop sa mga Parojinog nga naka-eskapo dihang nahitabo ang pagsilbi sa search warrants nga nagresulta sa dugu-ong engkuwentro tali sa kapolisan ug mga body guard niini.

Gibutyag sa testigo nga giingong una nga gipusil ang kapikas ni Parojinog,gisunod si Octavio Jr ug ayha ang mayor.Sa pagkakaron,nagtagu-tago na ang maong nagpatoong testigo tungod sa isyu sa iyang seguridad.

Una niini,namugos si PNP chief Dir Gen Ronald de la Rosa nga dili paglikidar ang gihimo sa ilang mga ginsakupan apan usa ka sensitibo nga police operation lamang batok sa mga Parojinog.
Samtang kasuhan sa PNP sa pagtagog’ suspected criminal ang pamilyang Parojinog nga giingong mihatag proteksyon sa giingong testigo nga nakakita kon giunsa pagpatay ang magtiayong Parojinog.

Kini ang tubag ni Ozamiz City Police Station commander C/Insp Espenido batok sa pahayag sa giingong testigo nga ubos sa safe custody sa mga Parojinog ning panahona.

Namahayag si Espenido nga kabahin sa ilang dakpon ang maong testigo samtang gipatuman niini ang search warrant sa pinuy-anan sa magtiayong Parojinog nga nagresulta sa ngilngig nga kremin sa Ozamiz City sa miaging kadlawon.