CAGAYAN DE ORO CITY-Gitambungan sa gatusang residente ang lubong sa pamilyang Parojinog sa Ozamiz City.
Kini human gihatod na sa ilang katapusang pahulayan sila si Mayor Reynaldo “Aldong” Parojinog Sr, asawa nga si Susan Parojinog ug igsoon nga sila si Mona ug Octavio Parojinog Jr.
Sa sulat nga gipadala ni Vice Mayor Nova Princess Parojinog kinsa gibasa ni Schielly Parojinog, nabiktima ang ilang pamilya sa mga traydor nga higala.
Gipamugos niini nga pulitika maoy hinungdan kon nganong gialegahan ang ilang pamilya nga nalambigit sa illegal nga droga, extortion, smuggler ug robbery.
Nagmahay usab ang pamilyang Parojinog sa mga kaalyado nila sa pulitika nga wala magpakabana sa gidangatan nga trahedya sa ilang pamilya.
Samtang naglaum si Nova Princess nga makab-ot gihapon sa ilang pamilya ang hustisya sa kamatayon sa iyang mga ginikanan.
Masaligon ang bise mayor nga moabot ang panahon nga malimpyohan ang ilang pangalan batok sa mga pulitiko nga nangdaut kanila.
Sa sulat nga iyang gipadala, gibutyag niini nga sa matag kita niya ni Ozamiz City Police Station commander C/Insp Jovie Espenido, iyang madumduman ang mga pulitiko nga mitraydor sa ilang pamilya.
Hisayrang napatay ang maong mga sakop sa Parojinog atol sa anti-illegal drug operation nga gilusad sa PNP niadtong Hulyo 30 ning tuiga.
