CAGAYAN DE ORO CITY-Luwas kan-on sa publiko ang 21 ka tonelada sa frozened dressed chicken nga gi-inspection sa health experts sa usa ka warehouse ning syudad.
Pasalig kini ni Dr Angelina Barcelona,head sa National Meat Inspection Section o NMIS-10 dihang pasado sa ilang pagsusi ang libuang kilo sa mga karneng manok nga gikan pa sa Luzon.
Gibutyag ni Barcelona nga gihulat nila ang lain pang resulta sa eksaminasyon ayha itugyan ang kargamento sa Freon Agri-business Logistics Corporation diin nakapangalan sa usa ka Joshua Unabia.
Samtang gitin-aw sa eksperto sa Bird Flu ubos sa Department of Agriculture -10 sa Bombo Radyo nga walay angayan kabalak-an ang mga konsumante sa mga manok nga anaa karon sa nagkadaiyang mga kamerkaduhan.
Namahayag si Dra. Kristy Baylo nga gigarantiya sa mga nanag-iya sa poultry farm ug mga suppliers sa karneng manok ning syudad ug lalawigan nga luwas ang ilang mga produkto sa bird flu.
Gituyo sa DA nga tapukon ang maong grupo aron mapaniguro nga dili moabot sa amihanang mindanao ang maong sakit.
Una niini, gibutyag ni Baylor nga wala pay natalang kaso sa bird flu transmission ngadto sa tawo.
