CAGAYAN DE ORO CITY-Gipasigarbo karon sa militar nga duol na nila mapulbos sa hingpit ang nabilin nga mga teroristang Maute-ISIS sulod sa war zone sa Marawi City,Lanao del Sur.
Kini human anaa na lamang sa tunga sa kilometros ang ginlapdon ang gipondohan sa mga terorista kuyog ang kapin 30 ka sibilyan partikular sa pipila ka moske sa maong syudad.
Gibutyag ni AFP spokesperson Brig/Gen Restituto Padilla nga gamay’ng panahon na lamang ang gikinahanglan sa ground commanders aron hingpit mapahagba ang mga nabiling mga terorista.
Namahayag si Padilla nga nagpabilin nga anaa pa sa 50 hangtod 60 Maute-ISIS fighters sukwahi sa una nila nga pahayag nga anaa na lamang sa kapin 40 ang nakig-engkuwentro batok sa gobierno.
Sa pagkakaron,anaa sa 601 ang mga terorista ang nakalas samtang 128 ang government forces ug 45 ka sibilyan sa halos tulo ka buwan nga enguwentro sa Marawi City.
