CAGAYAN DE ORO CITY-Subli gihagit sa Ozamiz City Police Station ang nagtagu-tago nga si City Councilor Ricardo ‘Ardot’ Parojinog nga boluntaryo na nga mo-surrender sa mga otoridad.
Kini kon tinood nga dili tinood nga siya kabahin sa narco-politicians nga naglihok ug nagbuhi sa criminal gangs sa Misamis Occidental.
Gihimo ni C/Insp Jovie Espenido,hepe sa Ozamiz City PNP ang hagit tungod sa pagkasikop ni Kolambogan Mayor Lorenzo Manigos nga giingong konektado sa mga Parojinog.
Una usab niini,namugos si Schielly Parojinog kinsa pag-umangkon ni City Mayor Reynaldo Sr nga bakak ang pasangil ni Espenido batok sa ilang pamilya.
Samtang ilugwa na sunod semana sa PNP Regional Internal Affairs Service Region 10 ang findings sa ilang imbestigasyon sa dugu-ong police anti-illegal drug operation batok sa mga Parojinog sa Ozamiz City.
Kini human tinguha masuta sa PNP-IAS kon ensakto ba ang pagpatuman sa police operation procedure ilabina nga 16 ka kinabuhi sa tawo ang nakalas sa maong operasyon.
Gibutyag ni PNP-IAS regional director Sr/Supt Gerry Galvan nga ang report na lamang gikan sa SOCO-10 ang ilang gihulat aron malugwa ang findings ug rekomendasyon kabahin sa hitabo.
Kabahin sa namatay sa operasyon ang magtiayong City Mayor Reynaldo Sr ug Susan Parojinog ingon man ang magsoong Mona ug Octavio Parojinog Jr.
