(Update) CAGAYAN DE ORO CITY-Iduso na sa govt prosecutors sa korte ang kasong pagbaligya ug paggamit sa illegal nga droga batok kang PO2 Arnold Almanzor ug live-in partnert nga si Grace Salvador sa adlaw’ng Martes.
Kini human nakita sa piskalya nga adunay probable cause ang gipasaka nga kaso sa kapolisan batok sa duruha nga nakuhaa’g 12 ka sachets sa shabu atol sa buy bust operation sa San Vicente, Brgy Casinglot,Tagoloan ning lalawigan sa miaging adlaw.
Gibutyag ni SPO4 Tawide Galleo,chief investigator sa Tagoloan Police Station nga ang kasong paggamit lamang sa shabu ang gitugtan sa piskalya nga maka-piyansa ang mga suspek balor 200-mil pesos.
Si Almanzor kinsa konektado sa Cugman Police Station ug Salvador ang gitakdang e-commit sa Misamis Oriental Provincial Jail sa oras masaka na sa korte ang kaso sunod semana.
Samtang insigida mulusad sa kaugalingong imbestigasyon o motu propio investigation ang regional Internal Affairs service kon PNP-10 IAS batok sa kalapasan nga nahimo ni PO2 Arnorld Alamanzor ug sa mga police nga nalambigit sa pagsikop kaniya.
Gibutyag ni COCPO spokesperson C/ Insp Mardy Hortillosa nga gihulatan pa sa City Investigation and Detective Unit ang kaso nga masang-at sa korte batok kang Alamanzor ayha hikayon ang kasong administratibo nga isang-at kaniya.
Hinoon, gitin-aw ni Hortillosa nga walay gahom si City Police Director Sr/Supt Roy Bahian nga ipalagpot sa puwesto si Almanzor kay didto man magsumikad ang dismissal order sa PNP-10 headquarters.
Dugtong niini, nagpahinumdum si Hortillosa sa tanang pulis nga sekreto nga nalambigit sa ilegal nga druga nga muhunong na kon dili sila gusto mawad-an sa trabaho o mapatay samtang masapon nga shabu ang gi-negosyo.
