CAGAYAN DE ORO CITY-Nakapamalikas sa iyang kasuko si Misamis Oriental Gov Bambi Emano nunot na sa pagkasikop sa personahe sa PDDRMO tungod sa illegal nga droga.
Si Emano miingon nga na-oktaba ang iyang pakigkita sa mga kalihim sa DPWH ug DA sa kauluhan tungod sa kontrobersiya nga gikalambigitan ni Misamis Oriental Disaster Risk Reduction Management Office weather monitoring chief Vergil Lago.
Nanganti si Emano nga dili na makabalik si Lago sa buhatan sa PDRRMO ug iya kining ipaubos sa preventive suspension.
Una niini, nasapon sa akto si Lago sa mga operatiba sa CDEU nga nagsuyop og shabu sulod sa usa ka inn ning syudad.
Samtang pahugtan ni Bambi Emano ang pagpahigayon og random drug testing sa trabahante sa kapitolyo probinsiyal.
Matud ni Emano nga kon kaniadto,anaa lamang sa 70 ka kawani ang ipaubos sa random drug testing, iya na kining himoon nga 150 ka trabahante. Nagbahad usab kini nga tanang mga pangalan nga iyang madunggan nga malambigit sa droga ang ipaubos niya sa random drug testing.
Una nang gitawag ni Emano nga ‘walay ayo’ ang mga tawo nga gagamit sa droga.
Una nang giangkon ni C/Insp Gilbert Rollen, hepe sa City Drugs Enforcement Unit nga usa ka bulan na nilang gimonitor ang ilegal nga kalihukan ni Lago.
Sumala ni Rollen nga dugay na nga gi-monitor sa iyang mga sakop ang lihok ni Lago pinaagi sa ilang asset.
Dugang pa niini nga ilang imbestigahan ang posibilidad kung gapamaligya sa illegal drugs ang suspek.
