CAGAYAN DE ORO CITY-Nagpadayon ang imbestigasyon sa kapulisan sa shooting incident nga gikamatay sa ilang personahe sa Philippine Air Force sulod sa kanhi Lumbia Airport ning syudad.
Maoy namatay ang biktima nga si Staff/Sgt Renante Felerca, 39-anyos, minyo ug residente sa Phantom St. Airwolf Village Pulung Maragul, Angeles City, Pampanga human gipusil sa suspek nga si Airman 2nd Class Reymart Noquera, 26-anyos, minyo ug nagpuyo sa Fairview, Quezon City.
Matud ni Lumbia Police Station deputy commander Sr/Insp Gomer Ladera nga nagkalalis ang duruha samtang nag-inom sulod sa headquarters nga nagresulta sa pagpamusil.
Gamit ang M-16 rifle, gipusil ni Noquera ang iyang senior non-commisioned officer diin naigo ang likod sa ulo niini.
Narekober usab sa crime scene ang 16 ka empty shells sa M-16 rifle.
Samtang, dili kumbinsido si Ladera nga ang panaglalalis lamang ang hinungdan sa maong hitabo, siya nagtuo nga may bug-at nga rason ang nahitabong pagpamusil.
Dugtong niini, buot sutaon sa Philippine Army kung nangong nag-inom sulod sa headquarters ang duha ka personahe sanglit hugot man kining ginadili sa area samtang naka duty.
Giklaro ni 4th ID spokesperson Capt Joe Patrick Martinez nga gitugutan lamang ang ilang mga personahe nga mo-inom sa higayon nga adunay okasyon limitado lamang.
