CAGAYAN DE ORO CITY-Ipabati sa grupong STAREX-Piston Northern Mindanao ang ilang puwersa kuyog ang pipila ka pundok aron supakon ang gihingusgan nga PUVs modernization program.
Gibutyag ni Ringo Lago,secretary general sa STAREX-Piston Northern Mindanao nga andam na sila paglusad sa picket rally atubangan sa LTFRB-10 ning semanaha.
Miingon si Lago nga supakon nila ang maong programa tungod kay dili makiangayon alang kanilang anaa sa han-ay sa kabus nga katilingban.
Ilusad nila ang picket rally dungan sa ubang pundok sa tibuok nasud sa Enero 24 ning tuiga.
Samtang giawhag ni LTFRB regional director Allan Guro ang grupong STAREX-Piston Northern Mindanao nga dili mangdamay sa mga lehitimong PUV operators nga mouban sa ilang picket rally
.Kini aron dili makabalda sa mga pasahero nga adunay mga trabaho sa maong adlaw.
Miingon si Guro nga gipatawag na niini ang maong grupo sa tuyo nga ipaabot ang mensahe nga dili mohimo’g puwerhisyo sa mga pasahero samtang mopadayag sa ilang pagsupak sa mga programa sa gobierno.
