CAGAYAN DE ORO CITY-Gikumpirmar ni PHIVOLCS-regional director Marcial Labininay nga upat ka linog ang mitay-og sa tibook Region 10 kaganinang kadlawon.
Si Labininay miingon nga sulod sa upat ka pagtay-og, maoy nabati sa mga residente ang 3.7 magnitude nga linog ingon man ang aftershocks.
Hisayran nga natugaw ang katawhan sa linog nga 3.7 magnitude sa pipila ka bahin sa rehiyon kaganihang kadlawon.
Kini human miigo ang linog sa 12 kilometros sa south-east sa Libona, Bukidnon diin nagbaton sa ginlawmon nga 3 kilometros ug tectonic in origin.
Mihimo usab pag-awhag si Labininay sa publiko nga moapil sa mga earthquake drill.
Kini sa tumong nga masayod ang katawhan kung unsay angayang buhaton kun ugaling tay-ogon sa makusog nga linog ang rehiyon.
Dugtong pa sa PHIVOLCS-regional director nga kinahanglang pangandaman sa katawhan ang linog tungod kay siya nagtoo nga daghan pang pagtay-og ang mahitabo sa tibook nasud ilabina nga daghan na aktibo nga bulkan.
