CAGAYAN DE ORO CITY-Gibatikos ni Govenor Bambi Emano ang desisyon sa mga personahe sa Department of Environment and Natural Resources nga pasirad-an ang Seven Seas Waterpark sa lungsod sa Opol ning lalawigan.
Si Emano miingon nga ‘bunga’ lamang sa kataranta ang gihimo sa ahensiya tungod sa nahitabo sa isla sa Boracay.
Dugang pa niini nga dili makatarunganon ang gihimo sa ahensiya nga pasirad-an gilayon ang maong water park ilabina nga nagbaton usab kini og nagkadaiyang permit.
Nanghinaut si Emano nga dili lang ‘for compliance’ ang gihimo sa DENR nga pag-inspeksiyon sa nagkadaiyang beach resorts sa tibook rehiyon.
Matud sa gobernador nga kun ugaling adunay kalapasan sa balaod sa kinaiyahan ang pipila ka resorts, kinahanglang hatagan una kini’g higayon nga matul-id ang ilang sayop ug dili gilayong pasirad-an.
Una nang gibutyag ni Emano nga makahatag daut nga imahe sa turismo sa Misamis Oriental ang kalit-kalit nga pagpasira sa DENR sa mga beach resorts.
