CAGAYAN DE ORO CITY- Patay ang bana sa milansad pagka-barangay kapitana sa ambush nga nahitabo sa Brgy Malanang,Opol,Misamis Oriental kagabii.
Giila ang biktima nga si Eliezer Zafra,hingkod ang panuigon,minyo ug kapikas ni Nilda Zafra kinsa nagpapili pagka-barangay kapitan batok kang incumbent Malanang Brgy Kapitan Seno Dragon nga pulos nagpuyo sa City Homes Subdivision,Opol,Misamis Oriental.
Miingon si Opol Police Station commander Sr/Insp Dennis Flores nga may nakakita nga gihulatan sa grupo ni Dragon ang sakyanan sa magtiayong Zafra samtang nagpasaka kini sa bukirang bahin ug nahitabo ang pag-ambush.
Nakasukol ang grupo ni Zafra apan nalupig sila hinungdan nga kini naigo ug dead on arrival dihang nadala sa pribadong ospital dinhi sa syudad.
Gilayong mitahan si Dragon aron ma-safety ug panalipdan ang kaugalingon niini batok sa pasangil sa nahitabo sa magtiayong Zafra.
Gipaubos usab sa pag-imbestigar sa kapolisan ang duha ka tawo ni Dragon nga ubos sa kustodiya sa Opol Police Station.
Narekober sa crime scene ang daghang kapsula sa M-16 ug kalibre 45 nga armas ingon man ang pribadong sakyanan sa magtiayong Zafra ug 7 ka motorsiklo.
Kini ang pinakaunang election related incident nga natigayon ubos sa hurisdiksyon sa Misamis Oriental diin unang gibutyag sa Comelec nga may pipila ka brgy nga anaa sa ilang hugot nga pagbantay.
