CAGAYAN DE ORO CITY-Blangko ang kapolisan sa suspek ug motibo sa pagpatay sa usa ka 35-anyos nga lalake sulod sa ilang panimalay diha sa Purok 5, Brgy Poblacion Magsaysay, Misamis Oriental.
Matud ni Magsaysay Municipal Police Station commander C/Insp Bimbo Buenaflor nga gipusil-patay ang biktima nga si Debb Bacoy samtang natulog sulod sa ilang panimalay.
Nakaangkon sa upat ka samad sa ulo ang biktima nga hinungdan sa iyang kamatayon.
Samtang giangkon ni Buenaflor nga dakong hagit alang kanila ang pagsulbad sa kamatayon sa 35-anyos nga si Debb Bacoy.
Siya miingon nga bisan ang inahan sa biktima ang maglisod paghulagway sa suspek nga mipusil-patay sa iyang anak tungod kay nakasu-ob kini sa bonnet.
Hisayran nga nakita sa inahan sa biktima ang gunman apan wala kini nahimo tungod kay armado ang suspek ug gitabunan usab ang panagway niini.
